Recent Posts

Breaking News

Kasal sa Valentine’s Day napaltos sa shabu

SIMBAHAN unta ang padulngan kay kasal nila kagahapon, Valentine's Day, apan prisohan ang ilang nalagputan niining mag-partner dihang nasikop sila sa kapulisan human sila naninda og shabu atol sa gikasa nga buy-bust operation sa Regional Special Operation Group (RSOG).

Mokabat sa P9,440,000 ang kantidad sa shabu nga nakuha gikan sa mag-partner nga sila Bembol Rabosa Papata, 39 anyos, ug Jeanet Narcelo Saicon, 46 anyos, pulos nagpuyo sa Bay-bay, Pindasan, Mabini, Davao De Oro.

Nasikop sab ang ilang kauban nga si Rex Jocotmaya Comaña, 28 anyos, taga Visayan Village atol sa operasyon alas 6:20 sa gabii niadtong Huwebes didto sa Rubio Memorial Services, Purok Rosal, Visayan Village, Tagum City.

Ang operasyon nag-ugat human sa makuti nga surveillance operation batok sa lihok sa mga dinakpan.

Sumala ni Police Lieutenant Colonel Ronald Lao, hepe sa RSOG ug sa Talomo police, nga usa kini ka joint operation sa Sta. Ana Police Station nga gipangunahan ni Police Major Michael Uyanguren.

Atol sa hamubo nga press conference sa Davao City Police Office (DCPO) Huwebes sa gabii, giingon sa mga dinakpan nga igo lamang sila naghatud sa ilang invitation card alang sa ilang kasal ug natingala na lang sila nga naa silay daghang shabu.

Mokabat sa 14 ka mga dagkong sako sa pakite sa gituohang shabu, mga cellphone ug marked money ang nakuha sa posisyon sa mga dinakpan.

Ang dinakpan nga si Bombol nailhan nga maoy number 7 Provincial Most Wanted Drug Personality sa Davao De Oro ug gipaubos na ang pangalan niini sa Directorate for Intelligence Drugs Watchlist.

Niining kasamtangan, ang mga dinakpan gipailawom na sa summary inquest procedure ug gipangbalhog sa selda sa Philippine Drug Enforcement Agency-Davao City. (Jeepy P. Compio)

Source: Sun.Star

No comments